Auld Lang Syne.

I.

    Should auld acquaintance be forgot,
        And never brought to min'?
    Should auld acquaintance be forgot,
        And days o' lang syne?
            For auld lang syne, my dear,
                For auld lang syne,
            We'll tak a cup o' kindness yet,
                For auld lang syne!

II.

    We twa hae run about the braes,
        And pu't the gowans fine;
    But we've wander'd mony a weary foot,
        Sin' auld lang syne.

III.

    We twa hae paidl't i' the burn,
        Frae mornin' sun till dine:
    But seas between us braid hae roar'd,
        Sin' auld lang syne.

IV.

    And here's a hand, my trusty fiere,
        And gie's a hand o' thine;
    And we'll take a right guid willie-waught,
        For auld lang syne.

V.

    And surely ye'll be your pint-stowp,
        And surely I'll be mine;
    And we'll tak a cup o' kindness yet,
        For auld lang syne.
            For auld lang syne, my dear,
                For auld lang syne,
            We'll tak a cup o' kindness yet,
                For auld lang syne!