To Robert Burns

Sweet Singer that I loe the maist
O' ony, sin' wi' eager haste
I smacket bairn-lips ower the taste
O' hinnied sang,
I hail thee, though a blessed ghaist
In Heaven lang!

For weel I ken, nae cantie phrase,
Nor courtly airs, nor lairdly ways,
Could gar me freer blame, or praise,
Or proffer hand,
Where "Rantin' Robbie" and his lays
Thegither stand.

And sae these hamely lines I send,
Wi' jinglin' words at ilka end,
In echo o' the sangs that wend
Frae thee to me
Like simmer-brooks, wi mony a bend
O' wimplin' glee.

In fancy, as wi' dewy een,
I part the clouds aboon the scene
Where thou wast born, and peer atween,
I see nae spot
In a' the Hielands half sae green
And unforgot?

I see nae storied castle-hall,
Wi' banners flauntin' ower the wall
And serf and page in ready call,
Sae grand to me
As ane puir cotter's hut, wi' all
Its poverty.

There where the simple daisy grew
Sae bonnie sweet, and modest too,
Thy liltin' filled its wee head fu'
O' sic a grace,
It aye is weepin' tears o' dew
Wi' droopit face.

Frae where the heather bluebells fling
Their sangs o' fragrance to the Spring,
To where the lavrock soars to sing,
Still lives thy strain,
For' a' the birds are twittering
Sangs like thine ain.

And aye, by light o' sun or moon,
By banks o' Ayr, or Bonnie Doon,
The waters lilt nae tender tune
But sweeter seems
Because they poured their limpid rune
Through a' thy dreams.

Wi' brimmin' lip, and laughin' ee,
Thou shookest even Grief wi' glee,
Yet had nae niggart sympathy
Where Sorrow bowed,
But gavest a' thy tears as free
As a' thy gowd.

And sae it is we be thy name
To see bleeze up wi' sic a flame,
That a' pretentious stars o' fame
Maun blink asklent,
To see how simple worth may shame
Their brightest glent.